Sjávarútvegsfyrirtækin Einhamar, Íslenskt sjávarfang og Samherji voru meðal helstu verðlaunahafa þegar Íslensku sjávarútvegsverðlaunin voru veitt í lok fyrsta dags IceFish 2024, miðvikudaginn 18. september 2024. Fyrirtækin hlutu viðurkenningarnar Framúrskarandi árangur á Íslandi, Framúrskarandi vinnsluaðili og Framúrskarandi alhliða birgir.
Verðlaun Einhamars, sem staðsett er í Grindavík, voru veitt fyrir árangur fyrirtækisins í áframhaldandi framleiðslu hágæða fiskafurða í bænum, þrátt fyrir tíðar lokanir og alvarlegar truflanir á innviðum vegna nýlegra eldsumbrota á Reykjanesskaganum.
Íslenskt sjávarfang, sem starfar í Kópavogi og á Þingeyri, hefur náð framúrskarandi árangri á ferskfisksmarkaðnum með úrvalsafurðir.
Samherji reisti eitt fullkomnasta fiskvinnsluhús heims á Dalvík, þar sem fyrirtækið framleiðir hágæða afurðir fyrir alþjóðlega markaði.
Eiríkur Sigurðsson, skipstjóri á Reval Viking, hlaut verðlaunin fyrir að vera Framúrskarandi íslenskur skipstjóri. Eiríkur, sem starfar fyrir Reyktal Fisheries, hefur innleitt nýja tækni til að draga úr kolefnisspori fyrirtækisins. Hann hefur einnig verið frumkvöðull á sviði nýsköpunar í léttitrollveiðum.
Verðlaunin, sem veitt voru í fyrsta skipti árið 1999, heiðra framúrskarandi árangur í íslenskum og alþjóðlegum sjávarútvegi. Þau leggja áherslu á nýsköpun og byltingarkenndar vörur á markaðnum og beina athyglinni að framúrskarandi þjónustu fyrirtækja.
Íslensku sjávarútvegsverðlaunin voru að þessu sinni haldin í samstarfi við matvælaráðuneytið og Kópavogsbæ, og veitt við lok fyrsta dags IceFish 2024. Vonin er styrktaraðili verðlaunanna.
Verðlaunaathöfnin hófst með því að 40 ára afmæli IceFish var fagnað og sérstök viðurkenning veitt öllum tryggustu sýnendum IceFish frá upphafi: Atlas, Baader, Borgarplast, Friðrik A. Jónsson ehf. Marel, Danish Export Association, Eimskip, Fiskifréttir, Hampidjan, Olís, Héðinn, Sæplast, Slippurinn, DNG og Scanmar.
Aðrir vinningshafar ársins voru:
• Skilvirkni í sjávarútvegi og fiskeldi, lítið fyrirtæki < 50 starfsmenn – GreenFish
• Skilvirkni í sjávarútvegi og fiskeldi, stórt fyrirtæki > 50 starfsmenn – Brunvoll AS
• Verðmætasköpun í vinnslugeiranum, lítið fyrirtæki < 50 starfsmenn – Klaki Tech
• Verðmætasköpun í vinnslugeiranum, stórt fyrirtæki > 50 starfsmenn – Marel
• Snjallverðlaun fyrir nýsköpun á sviði aukafurða – Ace Aquatec
• Besta nýja varan sem var kynnt á sýningunni – Hampiðjan hf
• Besti einstaki bás undir 50 m² – Raftakn ehf
• Besti einstaki bás yfir 50 m² – TM
• Besti þjóðar-, svæðis- eða hópbás – Pavilion of Denmark
